တစ်လဆိုတဲ့ ရက်ပေါင်းသုံးဆယ်
ဘယ်လိုများ ဖြတ်သန်းခဲ့ရလဲဆိုတာကို
တွေးမိလိုက်တိုင်း
ရင်ထဲမှာ မချိအောင်နာမိတယ် အကို … ။
အချိန်ရတိုင်း ကွန်ပျူတာရှေ့မှာထိုင်ပြီး
သူချစ်တဲ့မြို့တော်ကြီးမှာ ခင်းကျင်းပြသဖို့
အနုပညာတွေကို ဖန်တီးနေတတ်တဲ့
လူငယ်တွေအတွက် အကျိုးပြုစာပေတွေ
အာရုံစူးစိုက် ရေးသားနေတတ်တဲ့ အကိုတစ်ယောက်
ခုလို အမှောင်လွှမ်းနေတဲ့ နေရာတစ်ခုမှာ
ဖွင့်အံပြချင်တဲ့ စကားလုံးတွေကို
ရင်ထဲမှာပဲ စာစီလို့
မွန်းကြပ်နေရှာရော့မယ် … ။
ကလေးငယ်တွေအတွက်
လူငယ်လူရွယ်တွေအတွက်
တိုင်းပြည်နဲ့လူမျိုးအတွက်
အားလုံးအားလုံးအတွက်
မျှော်လင့်ချက်တွေအပြည့်နဲ့
အကိုမက်ခဲ့တဲ့ အိပ်မက်တွေကို
ငရဲသားတွေလက်ထဲက လွတ်မြောက်လာမယ့်နေ့တစ်နေ့မှာ
ဆက်လက်အကောင်အထည်ဖော်ခွင့်ရမယ်လ
ယုံကြည်ထားပါတယ် … ။
အဲဒီနေ့မှာ
နေခြည်တွေလဲ ဖြာလိမ့်မယ်
ကျေးငှက်တွေလဲ သာလိမ့်မယ်
အမှန်တရားရဲ့ ရောင်ခြည်တွေလင်းလက်လို့
မြို့တော်ကြီးတစ်ခုလုံး
ပြန်လည်အသက်ဝင်လာလိမ့်မယ်
မဝေးတော့တဲ့ အဲဒီနေ့မှာပေါ့ … ။
No comments:
Post a Comment